காலக்கணக்கு - 1
‘ரிஷி’
(லதா ராமகிருஷ்ணன்)
அன்று தெருவோர வீட்டில் யாரோ இறந்துபோயிருந்தார்கள்.
அந்த வழியாகப் போனால் நான் செல்லவேண்டிய இடத்தைச்
சீக்கிரமே சென்றடையலாம்.
ஒரு முடிவோடு பாதி தூரம் வரை சென்றவள்
இன்னொரு முடிவோடு பின்னேகி
எதிர்ப்புறமிருந்த சுற்றுவழியில் சென்று சேர்ந்தேன்
அரைமணிநேரம் தாமதமாக _
அலங்கார் ஹோட்டலில் விருந்துண்ண.
இன்று என் துக்கம் தெரியாமலோ
அதைப் பொருட்படுத்தாமலோ
நான்காம் வீட்டில் நிச்சயதார்த்தக் கோலாகலங்கள்.
ஆனாலும் _
காலம் கருணைமிக்கது.
கதறலொலிகள் எல்லாம் ஒருசேரத் திரண்டால்
காதுகளின் கேள்சக்தி மீறிய ஆழம் தேவைப்படுமென்றோ
கண்ணீர்களெல்லாம் ஒன்றிணைந்தால்
ஊழிப்பிரளயமாகிவிடுமென்றோ
பங்குபிரித்துவைத்திருக்கிறது
.
No comments:
Post a Comment