அணுகுமுறை - ’ரிஷி’ [லதா ராமகிருஷ்ணன்]

 அணுகுமுறை

’ரிஷி’

[லதா ராமகிருஷ்ணன்]

வாட்டசாட்டமாய் வளர்ந்திருந்தவர்

கையிலிருந்த பந்தை மேலே போட்டு

‘காட்ச்’ பிடித்தார்.

தரையில் போட்டு காலால் உதைத்தார்.

இரண்டு கைகளையும் பயன்படுத்தி

அப்படியுமிப்படியும் உருட்டி விளையாடினார்.

பிடரியிலிருந்து முதுகில் வழுக்கச் செய்து

கையைப் பின்னுக்கு நீட்டி

வாகாய் ஏந்திக்கொண்டார்

கீழே தப்தப்பென்று உள்ளங்கைகளால் அடித்து

நூறை வெற்றிகரமாக எட்டினார்.

குறிபார்த்து எதிர்ப்பக்கச் சுவரில் மோதிவிழும்படி வீசினார்.

மொட்டைத்தலைக் குட்டிப்பையன் தலையில்

குட்டுவதாயொரு தட்டுதட்டச் செய்தவர் பின்

பந்தை சுட்டிக்காட்டி

'எப்படி' என்று பெருமையோடு கேட்க

வலிக்கும் உச்சிமண்டையை தடவியபடியே

வந்த சிறுவன்

பந்தை அன்போடு எடுத்து

அதன் மேல் படிந்திருந்த அழுக்கைத்

தன் பனியன் நுனியால் ஆனமட்டும் போக்கி

அறை மூலையிலிருந்த தனது சின்ன மேஜையில்

ஒரு கைக்குட்டையை விரித்து

அதில் பந்தைப் படுக்கவைத்து

இன்னொரு கைக்குட்டையால் கொஞ்சம்போல் போர்த்தி

யதன் வேர்த்திருந்த கைகால்களை நீவித் துடைத்துவிட்டு

அதன் மொட்டைத்தலையை மென்மையாய்

வருடிக்கொடுத்தான்.