பொருளதிகாரம் - _ 1 _ ரிஷி(லதா ராமகிருஷ்ணன்)

பொருளதிகாரம் - 1

ரிஷி

கத்திக் கத்திக் களைத்த தொண்டைக்குள்

ஒரு கோலி சோடா புட்டியை ஊற்றிக்கொண்டவர்

திரும்பவும் பெருங்குரலெடுத்துப் பட்டியலிடத்

 தொடங்கினார்-

கோலி சோடாவின் கேடுகள் பற்றி;

தன் பேச்சைக் கேட்காமல் கோலி சோடாவைக் 

குடித்துக்கொண்டிருக்கும்

படித்த முட்டாள்களைப் பற்றி.

புட்டிக்குள்ளிருக்கும் கோலிகுண்டை 

சிறைப்பிடித்திருப்பது

சித்திரவதை, அநியாயம் என்று 

சுட்டிக்காட்டியபடியே

ஒரு ‘லிம்க்கா’வை வாயில் விட்டுக்கொண்டு

அடுத்த ஒலிவாங்கியிடம் சென்றார்

அந்தப் பெட்டிக்கடைக்காரருக்குப் பணம் 

தராமலே.

மினரல் வாட்டர் புட்டி தயாராய் மேஜைமீது 

வைக்கப்பட்டிருக்க

ஜனரஞ்ஜகத் திரைப்படக் கலைஞர்கள்

மேடையில் வரிசையாய் வீற்றிருக்க

மாற்று இலக்கியத்தின் தேவை குறித்து மிக நீண்ட

உரையாற்றி

மற்ற பேச்சாளர்களின் நேரத்தை அபகரித்துக் கொண்டவர்

காலம் பொன்னானது என்று கைக்கடிகாரத்தைப்

 பார்த்தபடி கூறினார்;

முத்தாய்ப்பாய் எத்தாலும் பேணுவோம்

சமத்துவம் எனச் சொல்லி

அரங்கிலிருந்து வெளியே சென்றார்

அவருடைய கைப்பெட்டியைத் தூக்கமாட்டாமல் 

தூக்கியபடி

ஒரு குழந்தைத் தொழிலாளி பின்தொடர

அடுத்து,

இன்னொரு கோட்-சூட் போட்டுக்கொண்டு

இந்தியக் கலாச்சாரம் பற்றி உரையாற்றத் 

தொடங்கினார்.

தமிழை வாழவைக்கவேண்டும் என்றார்

அந்த மொழிக்கே உரிய தனிச்சிறப்பான

ழகரத்தைப்

பிழையாக உச்சரித்து.

எளிமையாக வாழவேண்டும் என்றார்;

பழம்பெருமை போற்ற வேண்டும் என்றார்.

இடையிடையே ’கார்ப்பரேட்’ஐ வசைபாடி முடித்த

பின்

இரவு காக்டேய்ல் பார்ட்டிக்குக் கிளம்பிச் சென்றார்

புதிதாக அமெரிக்காவிலிருந்து இறக்குமதி

செய்யப்பட்டிருந்த சொகுசுக் காரில்

[*17 ஜனவரி 2016 திண்ணை இணையதளத்தில் இடம்பெற்றுள்ளது]

1. சொல்லதிகாரம் - ரிஷி

சொல்லதிகாரம்

ரிஷி

’ஐந்து’ என்ற ஒரு வார்த்தை மட்டும் சொல்லித்தரப்பட்டது

அந்த ஐந்து வயதுக் குழந்தைக்கு.

அது ஒரு இலக்கத்தைக் குறிப்பது என்ற விவரம் கூடத் தெரியாத

பச்சைப்பிள்ளையது.

பின், பலர் முன்னிலையில் அந்தக் குழந்தையிடம்

எண்ணிறந்த கூட்டல் கழித்தல் வகுத்தல் பெருக்கல் கணக்குகளுக்கான

விடை கேட்கப்பட

எல்லாவற்றுக்கும் மிகச் சரியான பதிலளித்தது குழந்தை:

“ஐந்து”

பிள்ளையின் அறிவைப் பார்த்து வாய் பிளந்து

மூக்கின் மேல் விரலை வைத்தார்கள்

ஐந்தே பதிலாகக் கட்டமைக்கப்பட்ட கணக்குகளின்

சூட்சுமம் அறியா அப்பாவிகள்.

அந்த ஒற்றையிலக்க விடை யொரு

தடையில்லா அனுமதிச் சீட்டாக

அந்த அப்பாவிகளின் முதுகிலேறி சிலர்

அன்றாடம் அயல்நாடுகளுக்குக்  

கட்டணமில்லாப் பயணம் போய்வந்தவாறு.


[*17 ஜனவரி 2016 திண்ணை இணையதளத்தில் இடம்பெற்றுள்ளது]

சூழல் மாசு - 'ரிஷி’

சூழல் மாசு

'ரிஷி’

காறித் துப்பத் தயாராய் வன்மம் நிறை வார்த்தைகளை

யெப்போதும் குதப்பியவாறிருக்கிறாய்.

தப்பாமல் கொஞ்சம் அந்தப் பக்கம் திரும்பித் துப்புகிறாய்;

கொஞ்சம் இந்தப் பக்கம் திரும்பித் துப்புகிறாய்;

காழ்ப்பேறிய உன் நுரையீரல், உணவுக்குழாய், 

குரல்வளை யெங்கிலும்

பரவிக்கொண்டிருக்கும் குரோத நஞ்சு.

நீ அப்பிக்கொள்ளும் பவுடர்,

வெட்டிக்கொள்ளும் புருவங்கள்,

கன்னத்து ரூஜ்,

உதட்டுச்சாயம்,

இன்னும் பலவற்றை மீறி

அகத்தின் அழுகல் முகத்தில் தெரிகிறது பார்.

உடல் பொருள் ஆவியாகும்

அகங்காரம், ஆங்காரம் கொப்பளிக்க

ஆங்காலம் போங்காலம் உன்னிலிருந்து கிளம்பும்

காறித்துப்பல்களில்

கணிசமாய் உன் மீதே பட்டுப் படர்ந்திருப்பதை

என்றேனும் உன்னால் உணரமுடியுமோ? 

சந்தேகம்தான்.

உன்னிடம் ஒரேயொரு வேண்டுகோள்:

நீ எதிரே வந்தாலே நாசியைப் பொத்திக்கொண்டு

நீங்கிச் செல்பவர்களை

‘நாசமாய்ப் போக’ என்று ஏசுவதற்கு பதில்

உன் ஊத்தை உள்ளிருப்பில் எங்குபார்த்தாலும் 

சிதறிக்கிடக்கும்

மாசுகளை  சுத்தம் செய்யச்
சிறிதேனும் முனைப்பு காட்டு.

(* ஜனவரி 2016 பதிவுகள் இணையதளத்தில் வெளியாகியுள்ளது)

திடக்கழிவுகள் - ரிஷி

திடக்கழிவுகள்

ரிஷி

குட்டி வாயும் குண்டுமணிக் கண்களுமாய்

படுசுட்டியாய்ப் பாய்ந்தோடும் சுண்டெலி தனி அழகுதான்.

ஐந்தறிவுள்ள அந்தச் சுண்டெலிக்குத் தெரியும்

அதன் வாழ்வெல்லைப்பரப்பின் நீள அகலங்கள்;

தனக்குப் பாதுகாப்பான பொந்து;

உணவு கிடைக்கக்கூடிய மூலைகள்….

ஆனால், ஆறறிவுள்ள சில அற்பச் சுண்டெலிகள்

ஆங்காலம் போங்காலம்

கிலி பிடித்தாட்ட,

தங்களைச் சிறுத்தைப்புலிகளாக ‘பாவ்லா’ காட்டி

இக்குணூண்டு கூட இல்லாத வாலை சுழற்றி

பொக்கைவாயின் சொத்தைப்பற்களே வளைநகங்களாய்

கெக்கேபிக்கேவென்று

கம்மிய குரலில்

சதா கீச்சுக்கீச்சென்று உறுமிக்கொண் டிருப்பதைக் கேட்க

உண்மையிலேயே கண்றாவியாக இருக்கிறது.

(* ஜனவரி 2016 பதிவுகள் இணையதளத்தில் வெளியாகியுள்ளது)

உளவியல் சிக்கல் - ரிஷி

உளவியல் சிக்கல்

ரிஷி

ஒரு மண்புழு

தன்னை கட்டுவிரியன் பாம்பு என்று எண்ணிக்கொண்டுவிட்டது.

வந்தது வினை.

புலியை அடித்துக்கொல்லச் சென்றது;

முடியவில்லை.

சிங்கத்தை விழுங்கித் திங்கப் பார்த்தது

முடியவில்லை.

யானையை

கரடியை

மாடை ஆடை முயலை கிளியை _

எதுவுமே முடியாமல் போனதில்

எந்த வியப்புமில்லை.

ஆம், மண்புழுவும் அன்புக்குரியதுதான் –

உண்மையானதெனில்!

(* ஜனவரி 2016 பதிவுகள் இணையதளத்தில் வெளியாகியுள்ளது)

கண்காட்சி - ரிஷி

கண்காட்சி

ரிஷி

பாவம், ஏனோ தெரியவில்லை – சாக்கடைக்குள் நின்றபடி

அந்தப் போக்கத்த பித்துக்குளிப் பேதைக் கழுதை

தன்னைப் படைப்புக்கடவுளாகக் கூவிக்கூவி விற்கும் எத்தனத்தில்

எழுதுகோலைப் பின்னங்காலாக்கிக்கொண்டு

அவரிவரெவரொருவரையும் விடாமல்

எட்டியுதைக்கப் பிரயத்தனப்பட்டுக்கொண்டேயிருக்கிறது….

மனதின் நோய்மை எலும்பு மஜ்ஜை வரை பரவி

பலவீன நோஞ்சானாயிருக்கும் தன்னை மாபெரும் பயில்வான் என்று

கற்பூரம் அடித்துச் சத்தியம் செய்யாத குறையாய் நம்பச் சொல்லி

ரம்பக் குரலில் கத்திக்கொண்டு புரண்டு விழுந்து எழுந்தழுதபடி

பொழுதைக் கழித்துக்கொண்டிருக்கிறது.

 ‘கரெண்ட்’டில் கைவிட்டதுபோல் வரட்டு வரட்டென்று

வாய்கோணக் கத்தும் அதை பார்த்து

கடந்து செல்பவர்கள் எல்லாம்

கழுதையல்லாக் கழுதை இஃதென்ன விசித்திரப் பிராணி

என்று விசனத்தோடு உச்சுக்கொட்டியபடி

தம் வழியேகிக்கொண்டிருக்கிறார்கள்.

(* ஜனவரி 2016 பதிவுகள் இணையதளத்தில் வெளியாகியுள்ளது)

' 24 x 7 +' மையங்கள் - ரிஷி

 '24x7+' மையங்கள்

ரிஷி

இரவு பகல் எந்நேரமும் திறந்திருக்கின்றன.

மும்முரமாய் கூவிக்கூவி வியாபாரம் நடந்தவாறு.

டாஸ்மாக் கடைகள் கூட நள்ளிரவைத் தாண்டி ஏதோவொரு சமயம்

மூடிவிடுவதாகக் கேள்வி.

ஆனால், இந்த விற்பனை மையங்களோ

ஒரு நாளின் 60,000 மணிநேரமும் ஓய்வின்றி இயங்கியபடியே….

வகைவகையாய்க் கொட்டிக்கிடக்கின்றன அதிகாரங்கள்.

வகைக்கிரண்டாய் பொறுக்கிப்போட்டு

கூறுகட்டி வைக்கப்பட்டிருக்கிறது.

அவ்வப்போது மாறிக்கொண்டிருக்கும்

கொள் பொருள் அளவுகள்.

சமத்துவம், சுதந்திரம், சகோதரத்துவம் _

சனாதனம், இனமானம், இந்துமதம் _

பௌத்தம், கிறித்துவம், கவித்துவம் _

முற்போக்கு, பண்பாடு, கலாச்சாரம் _

விளையாட்டு, வீரம், தீரம் _

காரம் சாரம் வாரம் சோரம் பேரம்……..

அமோகமாய் நடக்கிறது வியாபாரம்.

அள்ள அள்ளக் குறையா லாபம்.

(* ஜனவரி 2016 பதிவுகள் இணையதளத்தில் வெளியாகியுள்ளது)

அகாலப்புள்ளிகள் மேலாய் ஒரு பயணம்! ‘ரிஷி’

அகாலப்புள்ளிகள் மேலாய் ஒரு பயணம்!

 ‘ரிஷி’

(சிற்றிதழ் வெளியில் பல் பரிமாணங்களில் தொடர்ச்சியாக இயங்கிவரும் நண்பர் சி.மோகனுக்கு விளக்கு விருது வழங்கும் விழா சமீபத்தில் சென்னை லயோலா கல்லூரியில் நடைபெற்றது. கவிஞர் ஷங்கர ராம சுப்பிரமணியன், யவனிகா ஸ்ரீராம், யூமா வாசுகி, யவனிகா ஸ்ரீராம் நான் இன்னும் சிலர் மோகன் குறித்து உரையாற்றி னோம். அவ்வமயம் நான் வாசித்த கவிதை இது. 

சி.மோகனுடைய ஏற்புரை http://tamilsnow.com/?p=69782 இணையதளத்தில் காணொளி யாக இடம்பெற்றுள்ளது.

ஆறிலிருந்து அறுபதுக்கு மேலான பருவங்களின் அகாலப் புள்ளிகள் மேல்

படர் அடர் பாசிகளின் மீதாய் காலாற நடைபழகிக்கொண்டிருக்கிறாய்…

பயணத்தின் சுகம் கண்டுவிட்டால் பின் கல்லென்ன, முள்ளென்ன!

உன் பார்வைப் பரப்பெங்கும் எல்லையற்று விரிந்துகிடக்கும்

கண்ணுக் கெட்டாத் தொலைவின் வர்ணஜாலக் குறியீடுகள்!

அலைபாய்வே நிறைவமைதியான மனமும் அன்பே குணமுமாய்

இன்சொல்லே எந்நாளும் உன்னிலிருந்து கிளம்பும் பாங்கில்

தளும்பும் சிநேகிதம்.

ஒரு அமரகாவியப் புகைப்படத்தில் உன்னோடு தோள்சேர்த்து நிற்கும்

என்னருமைக் கவி ஷங்கர ராம சுப்ரமணியனின் கண்ணின் ஒளி காண

என்ன தவம் செய்தேனோ?!

மாற்றிதழ்க்காரர்களுக்கெல்லாம் உன் பெயர் முத்திரை வாசகம்!

உனக்கு நீயே வழங்கியவாறிருக்கும் வாசிப்பனுபவம்

உன்னால் எங்களுக்கு வாய்க்கும் வரமாகும்!

மனதை மயிலிறகால் வருடித்தரும் உன் குரல்!

சத்தமிடாமல் எனில் ஒருபோதும் சமரசம் செய்யாமல்

இயங்கிக்கொண்டிருக்கிறது

இன்றளவும் பழுதடையா உன் எழுதுகோல்!

முழுமையென்பதும் பின்னமே என்றுணர்ந்தவாறு

உன் வழியேகுகிறாய்

உடன் வருபவர்களை அரவணைத்தபடி.

நேற்றும் இன்றும் நாளையுமாய் தன் பாட்டில்

நம்மை வாழவைத்திருக்கும் காற்றுக்கு

என்னவென்று நன்றிசொல்வது என்று புரியாமல்

எப்பொழுதும் போல்

அரைகுறையாய் தன்னை நிறைவாக்கிக்கொள்கிறது இக்கவிதை.