திடக்கழிவுகள்
ரிஷி
குட்டி வாயும் குண்டுமணிக் கண்களுமாய்
படுசுட்டியாய்ப் பாய்ந்தோடும் சுண்டெலி தனி அழகுதான்.
ஐந்தறிவுள்ள அந்தச் சுண்டெலிக்குத் தெரியும்
அதன் வாழ்வெல்லைப்பரப்பின் நீள அகலங்கள்;
தனக்குப் பாதுகாப்பான பொந்து;
உணவு கிடைக்கக்கூடிய மூலைகள்….
ஆனால், ஆறறிவுள்ள சில அற்பச் சுண்டெலிகள்
ஆங்காலம் போங்காலம்
கிலி பிடித்தாட்ட,
தங்களைச் சிறுத்தைப்புலிகளாக ‘பாவ்லா’ காட்டி
இக்குணூண்டு கூட இல்லாத வாலை சுழற்றி
பொக்கைவாயின் சொத்தைப்பற்களே வளைநகங்களாய்
கெக்கேபிக்கேவென்று
கம்மிய குரலில்
சதா கீச்சுக்கீச்சென்று உறுமிக்கொண் டிருப்பதைக் கேட்க
உண்மையிலேயே கண்றாவியாக இருக்கிறது.
(* ஜனவரி 2016 பதிவுகள் இணையதளத்தில் வெளியாகியுள்ளது)
