அடிவருடிகள் ‘ரிஷி’ (லதா ராமகிருஷ்ணன்)

 அடிவருடிகள்

‘ரிஷி’

(லதா ராமகிருஷ்ணன்)

அவர் சொன்னார் அப்படி

இவர் சொன்னார் இப்படி

எப்படி சொல்லியிருக்கிறார் பார்த்தாயா

என்னமாய் சுட்டிக்காட்டியிருக்கிறார் கேட்டாயா

கேட்பாயா மாட்டாயா

கேட்டால் உய்வாய்

கேட்காவிட்டால் உன்னுடையது பொய்வாய்

என்று சந்நதம் வந்தாற்போல்

நாலாந்தர விளம்பரப் பாடலாய்

ஆலாய்ப் பறந்தபடி

இன்னுமின்னுமாய் ’ஜய்ஞ்ஜக்’ தாளம் தட்டிக்கொண்டேயிருந்தவரிடம்

Silly’ ஆக இருந்தாலும் பரவாயில்லை

சுயமாய் உங்களுக்கே ஏதாவது தோன்றி

நீங்களாக ஏதாவது சொல்லும் நாளில்

சொல்லியனுப்புங்கள்

சாக்லேட் வாங்கி வந்து நான் செவிமடுக்கிறேன்

சண்டைபிடிக்கிறேன்

அல்லது சிலாகிக்கிறேன்

என்று சுருக்கமாக விடைபெற்றுக்கொண்டு

என் வழியே நடக்க ஆரம்பிக்கிறேன்

என் சீடரும் குருவுமாகிய நான்.

 

லைக்’ வள்ளல் ’ரிஷி’ (லதா ராமகிருஷ்ணன்)

 லைக்’ வள்ளல்

’ரிஷி’

(லதா ராமகிருஷ்ணன்)

கொலைகாரர்களுக்கும் தருவார் ‘LIKE’

கொல்லப்படுகிறவர்களுக்கும் தருவார் ‘LIKE’

குழந்தைகளுக்கும் தருவார் LIKE

குட்டிச்சாத்தான்களுக்கும் தருவார் LIKE

பெண்ணியவாதிக்கும் தருவார் LIKE

ஆணாதிக்கவாதிக்கும் தருவார் LIKE

கொடுமைக்கார மாமியாருக்கும் தருவார் LIKE

கொடூர மருமகளுக்கும் தருவார் LIKE

இந்தி எதிர்ப்பாளருக்கும் தருவார் LIKE

தமிழ் வெறுப்பாளருக்கும் தருவார் LIKE

மறைவேத நம்பிக்கையாளருக்கும் தருவார் LIKE

இறை மறுப்பாளருக்கும் தருவார் LIKE

வெறுப்பு அருவருப்பானது என்பாருக்கும் தருவார் LIKE

அரும்பெருமையுடையது என்பாருக்கும் தருவார் LIKE

காதல் கட்டாயம் வேண்டும் என்பாருக்கும் தருவார் LIKE

கூடவே கூடாது என்பாருக்கும் தருவார் LIKE

எழுத்தில் கண்ணியம் காப்பவருக்கும் தருவார் LIKE

கண்ணியமா மண்ணாங்கட்டி என்பாருக்கும் தருவார் LIKE.

கட்டெறும்புக்கூட்டங்களுக்கும் தருவார் LIKE

சுட்ட அப்பளங்களுக்கும் தருவார் LIKE

விட்டகுறை தொட்டகுறையாய் அவரிடம் அத்தனை LIKE

எவருக்கோ எதற்கோ தர எக்கச்சக்க LIKE

அன்றாடம் அரிசிமிட்டாயாய் அவர் இறைக்கும் LIKE

அவருக்கு என்றாவது பெற்றுத்தரலாம் ‘LIKE வள்ளல்’ பட்டம்!

அதற்கும் இப்போதே போட்டுவிட்டார் ஒரு LIKE!!

வாய்கள் ‘ரிஷி’ (லதா ராமகிருஷ்ணன்)

 வாய்கள்

‘ரிஷி’

(லதா ராமகிருஷ்ணன்)

பேசுவதற்கென்றே சில வாய்கள்

மூடியிருக்கவென்றே சில வாய்கள்

பேசும் வாய்களைப் பகடி செய்யவும் பழிக்கவும்

பேசவிடாமல் செய்யவும்

சில வாய்கள்

பேசினால் பிடாரி

பேசாவிட்டால் பயந்தாங்கொள்ளி

நாவடக்கம் எல்லோரிடமும் ஒரேயளவாய்ப் பகுக்கப்படுவதில்லை.

நாவினாற் சுட்ட வடு இல்லாதார் யார்?

ஊர் பேர் உள்ள காருக்கேற்ப

ஒருவர் ஏற்படுத்திய காயம் உட்காயமாக

இன்னொருவர் உண்டாக்கியது அங்கிங்கெனாதபடி

எல்லாவிடமும் சுவரொட்டிகளாகும்.

சிலர் வாயால் வடைமட்டுமா சுடுகிறார்கள்?

பஜ்ஜி போண்டா பராத்தா பிரியாணி

பக்கோடா இன்னும் என்னென்னவோ

உள்ளூர்வாசிகளுக்கும் சுற்றுலாப்பயணிகளுக்குமாய்

வியாபாரம் அமோகமாய்.

பேச்சுரிமை சில வாய்களின் தனிச்சொத்தாக

சகமனிதர்களின் குரல்வளைகளை நெரித்துக்

குரலற்றவர்களாக்கி

அவர்களுக்காகப் பேசியவாறிருக்கும் சில வாய்கள்.

விளம்பரங்களால் பெண்ணுரிமையின் வாயில் நஞ்சூற்றிப் பொசுக்கியபடியே

பெண்விடுதலையை முழங்கிக்கொண்டிருக்கும் அச்சு ஒளி-ஒலி ஊடக வாய்கள்.

சின்னக் குழந்தைகளின் வாய்களில் நுழையமுடியாத சொற்களைத் திணித்துத்

தங்களுடைய வெறுப்பையும் வன்மத்தையும்

கக்கவைத்துக்கொண்டிருக்கும் பெரியவர்களின் வாய்கள் இப்போதெல்லாம் வெற்றிலைக்கு பதிலாக

அரசியலையே அதிகம் குதப்பியபடி.

பிறவியிலேயே வாய்பேச முடியாதவளின்

மனமெல்லாம் பேசும் வாய்களாக

நிலைக்கண்ணாடி முன் நின்றவண்ணம் பேச முயற்சித்துக்கொண்டிருக்கும் அவளுடைய

நாபியிலிருந்து பீறிடும் அமானுஷ்ய ஒலிகளின்

மொழியறிந்ததாய் அருகிலிருந்த மரத்திலிருந்து

ஒரு பறவை கீச்சிடுகிறது.

அவளுக்கு அது கேட்குமோ தெரியவில்லை.

வாயிருப்பதால் மட்டும் எல்லாவற்றையும் பேசிவிட முடிகிறதா என்ன?

மூடிய அறைக்குள் யாருமற்ற நேரத்தில் உரக்கத் தானும் தானான பிறனுமாக உரையாடிக்கொண்டிருந்தால்

மனநல விடுதிக்கு அனுப்பிவைக்கப்படும் சாத்தியக்கூறுகள் அதிகம்.

அதனால்தானோ என்னவோ

அடித்தால் பதிலடிகொடுக்கவியலாத பலவீனராய்த் தேர்ந்தெடுத்து

அடித்துக்கொண்டேயிருக்கின்றன சில வாய்கள்.

நான் யார் தெரியுமா!?!? ‘ரிஷி’ (லதா ராமகிருஷ்ணன்)

 நான் யார் தெரியுமா!?!?

‘ரிஷி’

(லதா ராமகிருஷ்ணன்)

_ என்று கேட்பதாய்

சில அமைச்சர்களுடன் தான் இருக்கும் சில புகைப்படங்களை வெளியிட்டிருக்கிறார்.

_ என்று புரியச்செய்வதாய்

மறவாமல் சில முன்னணி நடிக நடிகையர்

இயக்குனர் இசையமைப்பாளர்களுடன்

புதுப்பட பூஜை நிகழ்வில்

பங்கேற்ற செய்திகள் படங்களோடு

வெளியாகச் செய்திருக்கிறார்.

_ என்று அடிக்கோடிட்டுக்காட்டுவதாய்

சர்வதேச (நாலாந்தர) எழுத்தாளருடன்

தோளோடு தோள் சேர்த்து நின்ற, நடந்த

காணொளிக் காட்சிகளை

வெளியிட்டிருக் கிறார்.

_ என்று வீரமுழக்கம் செய்வதாய் தலைமறைவுப்போராளிகள் சிலருடன்

காட்டில் குத்துக்காலிட்டு அமர்ந்து

உணவுண்ட காட்சிகளின்

(அதற்கென்றே பிரத்யேகமாக அழைத்துச்

செல்லப்பட்ட சித்திரக் கலைஞரான

தோழரால் கிறுக்கப்பட்ட)

கோட்டோவியங்களை

சுற்றிலும் இறைத்து

நடுவே சிந்தனையார்ந்த முகபாவத்துடன்

தன்னை இருத்திக்கொண்டு எடுத்த

செல்ஃபிகளை

சரசரசரவென்று தொடர்ச்சியாக சில நாட்கள் வெளியிட்டிருக்கிறார்.

_ என்று அழுத்தமாக எடுத்துரைப்பதாய்

மெய்நிகர் மலையொன்றின் உச்சியில்

அமர்ந்தவாறு

சுற்றிலும் பல வயதுகளிலான ஆண்களும்

பெண்களும்

அவர் வாயிலிருந்து விழும் முத்துக்களை

ஆவேசமாகப் பாய்ந்து பாய்ந்து பொறுக்கி யெடுத்துக்கொள்வதை

ஒரு மந்த காசப் புன்னகையுடன் பார்த்தவா

றிருக்கும் புகைப்படங்களை

அவருடைய நான்கைந்து பக்தகோடிகள்

Bit Noticeகளாய் வினியோகித்துக்கொண்

டிருக்கிறார்கள்.

என்றென்றென்றெனக் கேட்பதான

அத்தனை படங்கள், கோட்டோவியங்கள்,

காணொளிகள், குறுஞ் சுவரொட்டிகளைப்

பார்த்தபின்பும் அசராமல் நின்று கொண்டிருக்கும் வாசகரைப் பார்த்து

‘நான் யார் தெரிகிறதா?’

என்று கேட்டவரிடம் _

_ உங்கள் எழுத்தின் மூலமே தெரிகிறது –

இத்தனை ‘Stage Props’ எதற்கு

என்று எதிர்க்கேள்வி கேட்ட வாசகர்

தன் கையிலிருந்த முகமறியாக் கவியின்

தொகுப்புக்குள்

கூடுவிட்டுக்கூடு பாய்ந்தார்!

மொழிபெயர்ப்புச் சுதந்திரமும் அத்துமீறலும் - ‘ரிஷி’ (லதா ராமகிருஷ்ணன்)

 மொழிபெயர்ப்புச் சுதந்திரமும் அத்துமீறலும்

‘ரிஷி’

(லதா ராமகிருஷ்ணன்)

மொழிபெயர்ப்பாளர் மூல ஆசிரியரின் அடிமையில்லைதான்

அதற்காக, மூல ஆசிரியராகிவிட

முடியுமா என்ன?

அன்றி மூல ஆசிரியரின் இணையாசிரியராகி

விடலாகுமா?

கேள்வி முடியும் முன்பே

முடியும் ஆகும் முடியும் ஆகுமென்று

முடிந்த முடிவாக மொழிபெயர்ப்பாளர்

முன்மொழிய

அன்பு காரணமாகவோ பண்பு காரணமாகவோ

மூல ஆசிரியர் அதை வழிமொழிய

மகிழ்ந்துபோன மொழிபெயர்ப்பாளர்

உருவைக் கருவாக்கி

எருவை வெறுவாக்கி

பருவை மருவாக்கி

சிறுவை பெருவாக்கியதோடு நில்லாமல்

ஒருவை ஓரங்கட்டி

திருவைத் திருட்டுப்போகச் செய்து

இரவைப் பகலாக்கி

பறவையை பிராணியாக்கி

பிரண்டையை யாளியாக்கிக்கொண்டே போக

மொழிபெயர்ப்பொரு மீள்கவிதையாக்கம்

என்று முழங்கி

மூல கவிதையின் நுட்பங்களெல்லாம்

மொழிபெயர்ப்பில் வெட்டி

யகற்றப்பட்டுவிட்டதில்

மூல கவிதையின் ஆணிவேர்

ஆட்டங்காண

முளைவிதை முடங்கிக்கொண்டது

அடியாழத்தில்!

ஃபேஸ்புக் டைம்லைன் என்னும் நிலைக்கண்ணாடியும் நாடகமேடையும் - ரிஷி (லதா ராமகிருஷ்ணன்)

 ஃபேஸ்புக் டைம்லைன் 

என்னும்

நிலைக்கண்ணாடியும் நாடகமேடையும்

ரிஷி

(லதா ராமகிருஷ்ணன்)

மிகை ஒப்பனை வரிகளின் உதவியுடன்
தன்னை அலங்கரித்துக்கொள்ள ஆரம்பித்தவர்
பெண்ணெனில் ஒரு பட்டாம்பூச்சியைத்
தன் காதோரக் கூந்தலில் செருகிக்கொள்கிறார்
ஆணெனில் அதைத் தன் சட்டைப்பையில் சொருகிக்கொள்கிறார்.
பட்டாம்பூச்சி படபடவென சிறகுகளை
பயத்தில் அடித்துக்கொள்வதைப் பார்த்து
ரத்தக்கண்ணீர் வடிப்பவர்
பெண்ணெனில் ஒரு சோகப்பாட்டு பாடுகிறார்.
ஆணெனில் கண்ணீரை அடக்கிக்கொள்ள உதடுகளும் தாடையும் இறுக
தலைகுனிந்து அமர்ந்தபடியிருக்கிறார்.
பெண்ணோ ஆணோ துயரத்திலாழ்ந்திருக்கும்போது
தம் முகம் கோணலாகக்காணப்படவில்லையே என்ற கவலை
இருவருக்குமே இருப்பது இயல்புதானே...
அந்த ஆணும் பெண்ணும் ஆளுக்கொரு கவிஞரை
மறவாமல் இரண்டுநாட்களுக்கு ஒருமுறை நினைவுகூர்கிறார்கள்.
பெண் என்றால் ஆணையும் ஆண் என்றால் பெண்ணையும்
அதிகம் நினைவுகூர்வதும் இயல்புதானே
நினைவுகூரப்படுபவர் அகில உலகம் அறிந்தவராக இருப்பதும்
ஆறே ஆறு பேர் அறிந்தவராக இருப்பதும்
அந்தந்த நேரத்துத் தேவையைப் பொறுத்தது
நினைவுகூரப்படுபவர் நினைவுகூரப்படுவதாலேயே அதிகம்
நினைவுகூரப்படுபவராகி அதற்கான நன்றியுணர்வில்
நிர்க்கதியாகி நிற்கும் தோற்றத்தை நிலைக்கண்ணாடி பிரதிபலிக்க
தாம் ஏற்கும் பாத்திரம் அதுவேயாகிய 

நடை யுடை பாவனையுடன்
மேடையேறிச் செல்கிறார். மணியடிக்கிறது. மேலேறிச் செல்கிறது திரை.
காலவரையற்ற நாடகம் நடந்துகொண்டிருக்கிறது.

நிகழ்த்துகலை - ‘ரிஷி’ (லதா ராமகிருஷ்ணன்)

 நிகழ்த்துகலை

‘ரிஷி’

(லதா ராமகிருஷ்ணன்)

இன்னொருவர் தலைமீது காகம்

எச்சமிட்டுச் சென்றால்

அருகிருப்பவருக்கு அப்படியொரு சிரிப்பு.

தன் தலையில் விழவில்லையே என்ற இறுமாப்பு.

மனிதத் தலைகள் காகங்களின் இலவசக் கழிப்பறைகள்

என்று கோணவாய்ச் சிரிப்போடு

தத்துப்பித்தென்று சில முத்திரை வாசகங்களை

உரிய ஏற்ற இறக்கங்களைக் குரலில் வரவழைத்து

உரத்துச் சொல்வது அவர்தம் தனிச்சிறப்பு.

விட்டால்

காக்காய்க்கு நல்லவரை அடையாளங்காணத் தெரியும்

என்று கதைக்கவும் தயங்கமாட்டார்கள்.

புறம்பேசி முடித்த பிறகு மறவாமல் சொல்லிக்கொள் வார்கள்

‘நமக்கெதற்கு பொல்லாப்பு’

சரி தப்பு என்பதெல்லாம்

அவரவருக்குக் காப்பாகவும் அடுத்தவருக்கு ஆப்பாகவும்

உருமாறும் திறமெழுத வேறொரு (Half-Boiled) KAFKAவால்தான் முடியும்

குப்புற விழுந்தாலும் ஒட்ட வழியில்லாதபடி மீசையை

மழித்துக்கொண்டுவிடுவதுதானே புத்திசாலித்தனம்

கழுகு மூக்கில் நாம் சுண்டெலியாகும்வரை

பழகாது வலி;

தத்துவம், ஆன்மிகம், அபத்த நாடகம், எக்ஸிஸ்டென்ஷியலிஸம், சந்தர்ப்ப சூழல், குறிப்புரை பொழிப்புரை பரப்புரையெனத் தேவையான பழமொழி புதுமொழிகளோடு ஆங்காங்கே பீடமமைத்துப்

பிப்பிப்பீ டும்டும்டும் கொக்கரக்கோ பெப்பரப்பே யென

கலந்துகட்டிக் கூட்டாஞ்சோறிடுவதாய் ஆகப் பெருமுழக்கமிடுவது

அடடாவோ பழக எளிதான பழியறு வாழ்நெறி

அடி தெறி

என வாழ்ந்துகொண்டிருப்பார் சிலபலர்

இங்கே ஒப்பாரும் மிக்காரும் இலராக….

உடலின் மனம் - ’ரிஷி’ (லதா ராமகிருஷ்ணன்)

 உடலின் மனம்

’ரிஷி’

(லதா ராமகிருஷ்ணன்)

பாலியல் தொழிலாளிதான் அவள்

அண்ணே அண்ணே என்று பகலில் விளிப்பவர்களோடு

அன்றன்றைய இரவுகளில் நெடுஞ்சாலை மேம்பாலத்தடி

அதிகாலை யிருளில்

இடுக்குமுடுக்கில் படுத்தெழவேண்டிய பிழைப்பு

அவசர அவசரமாய் ‘சோலி’ முடிப்பவர்கள்

அவளளவில் அருளாளர்கள்.

அன்னாரொருவரிடமிருந்து கிடைத்த பணத்தில்

அடுத்த வீட்டில் இரண்டு மூன்று மணிநேரங்கள்

பார்த்துக்கொள்ளச் சொல்லிவிட்டுவந்திருக்கும்

நான்கு வயதுமகனுக்கும் ஆறு வயது மகளுக்கும்

தெருவோரக்கடையிலிருந்து டீ பன்

வாங்கிக்கொண்டு விரைந்தாள்

வழியில் குறுக்கிட்ட வாடிக்கையாளரொருவன்

வரச்சொல்லி யழைக்க

’விழித்துக்கொண்டு காத்திருப்பார்கள் குழந்தைகள்’

எனச் சொல்லி கையிலிருந்ததைக் காட்ட

”அட, வாடீ” என்று இடுப்பை வளைத்து இழுத்தவன்

கையை

வெடுக்கென கடித்து அகன்றவளின்

ஒவ்வொரு பல்லும்

பிளேடாய்

பிச்சுவாக்கத்தியாய்

அருவாமணையாய்

அரிவாளாய்….

INSIGHT - JUNE 2022 (a bilingual blogspot for contemporary Tamil Poetry )