கிளைபிரியும் குறுக்குவழிகள்
ரிஷி
(லதா ராமகிருஷ்ணன்)
அறுபது பேரோ அறுநூறு பேரோ
ஆறாயிரம் பேரோ
எந்தக் கூட்டமானாலும் விவிஐபிக்களோடு
‘குழுவாக நின்று படமெடுப்பது இயல்புதான்.
வட்டமேஜை அமர்வுகளையும் படமெடுப்பார்கள்;
உணவு இடைவேளையில் கையில் தட்டுடன்
சிறு சிறு வட்டங்களாக நின்றவண்ணமே செவிக்குணவும் வயிற்றுக்குணவுமாக பசியாறுவதையும் படமெடுப்பார்கள்;
கவனமாகப் பார்த்துப்பார்த்து
பிரபலங்கள் பக்கத்தில் இடம்பிடித்துவிட்டால்
பின் புகைப்படங்களில் இருக்கும் மற்றவர்களை
‘க்ராப்’ செய்து நீக்கிவிடலாம்.
பிறகென்ன
தானும் பிரபலமும்
நகையும் சதையும்போலவென்றால்
நம்பித்தானே ஆகவேண்டும்
நாங்கள் நீங்கள் அவர்களெல்லாம்….
No comments:
Post a Comment