கவிதையின் உலகம்
ரிஷி
(லதா ராமகிருஷ்ணன்)
பிரபலமாயிருப்பதாலேயே கவிஞராயிருப்பவர் உண்டு.
கவிஞராயிருப்பதாலே பிரபலமாகாதவர்கள் உண்டு.
பிரபலமாயில்லாததாலேயே கவிஞராகாதவர்கள் உண்டு.
கவிஞரென்ற அடைமொழியுடன் உலகெங்கும் சுற்றிவருபவர்கள் உண்டு
சுற்றச்சுற்ற விரிவடையுமவர் தலைமேலான
ஒளிவட்டங்கள்
அடுத்த தெருவுக்கும் போயிராதவரின்
அவருக்கும் அவரை அறிந்தவர்களுக்கும் மட்டுமே
தெரிந்த கவிதையின்
அறியப்படாத ஆழ நீள அகலங்கள்
புலப்படுமோர் நாளில்
உலகம்சுற்றிக்கவிஞர்களைப் பற்றிய பிரமிப்பு
விலகி
உயிருள்ள கவிதை இன்று பிறந்த குழந்தையாய்
கைகால்களை உதைத்துக்கொள்ள ஆரம்பிக்கும்.
No comments:
Post a Comment