இலக்கிய ஆர்வலர்
‘ரிஷி’
(லதா ராமகிருஷ்ணன்)
நீங்கள் என்ன புத்தகங்கள் எழுதியிருக்கிறீர்கள்
என்று கேட்டார்
என் புத்தகங்களைக் கேட்டுச்சொல்கிறேன்
என்றேன்
என்ன பதில் இது என்று விசித்திரமாய்
என்னைப் பார்த்தவர்
இலக்கியக்கூட்டங்களில் உங்களை நான் பார்த்ததேயில்லை என்றார்
நான் பங்கேற்ற இலக்கியக்கூட்டங்களின் போது
அவர் பிறந்திருக்கக்கூடும்.
பட்டியலிடும் உத்தேசமில்லாததால்
’பார்த்திருக்க வாய்ப்பில்லை’யென்று மட்டும்
சொல்லிவிட்டு நகர்ந்தேன்.
நின்று திரும்பி
நீங்கள் என்னைப் பார்க்கவில்லையென்பதால்
நான் இந்த உலகத்தில் இல்லையென்றாகிவிடாது
என்று சொல்லத்தோன்றியது.
சோம்பலாயிருந்ததால் சும்மாயிருந்துவிட்டேன்!
No comments:
Post a Comment