பறவைப்பார்வையைப் பொருள்பெயர்த்தல்

பறவைப்பார்வையைப் பொருள்பெயர்த்தல் -2

                                          ’ரிஷி’ (லதா ராமகிருஷ்ணன்)

 

1. 
பறவைப்பார்வையில் குக்குறும் புள்ளிகளாகத் 
தெரிந்தன தலைகள்.
உண்டிவில்லுக்கு அப்பால் பறப்பதே 
வாழ்வாயிருந்தது ஒரு காலம்
பின் துப்பாக்கிகள் வந்தன.
அநாதரவாய் ஆகாயத்தில் 
உயிர்தப்பிப் பறக்கும்போதெல்லாம்
எண்ணாமலிருந்ததில்லை:
’அந்தரத்தில் கூடு கட்ட முடிந்தால் 
எத்தனை நன்றாயிருக்கும்’

2. 
யாருக்கும் புரியாது அதன் மொழி;
எனவே அதற்குப் பேசத்தெரியாது என்கிறார்கள்.
ஆனாலும் மிகுந்த எச்சரிக்கையோடு அந்தப் பறவை
கற்றுக்கொண்டுவருகிறது –
மந்திரமாகும் சங்கேதச் சொல் ஒன்றை
அதைக் கீச்சிட்டால்
தனக்கு இளைப்பாற இடம் தந்த
அருமை நண்பனை விரட்டி வெருட்டும் வியூகங்கள்
வெண்பனியாய் விலகி மறைய
தன்வழியேகிடுவான் தோழன்
திரும்பவேண்டிய தேவையின்றி.