இயங்கியல் - ‘ரிஷி’ (லதா ராமகிருஷ்ணன்)

இயங்கியல்

‘ரிஷி’

(லதா ராமகிருஷ்ணன்)

இரு நாற்பதுகளுக்கு மேல் இருக்கும் வயது.

இருந்தும், இன்றெழுதிவரும் கவிஞர்களில் இடம்பெறுபவர்.

”இவரா கவிஞர்? ஐயையையே” என்று மலம் மிதித்ததாய்

மறைவாய் முகஞ்சுளித்தபடியே

அவருக்கு முகமன் கூறி விதந்தோதி மலரச் சிரிக்கும்

சக கவிகள் சிலர் உண்டென்றாலும்

அவசியம் படிக்கவேண்டிய கவி யிவர் என்பதே

அப்பட்டமான உண்மை.

அப்படியிருந்தும்

இன்றுவரை இலக்கிய பீடாதிபதிகளால் அதிகவனமாக

கண்டுங்காணாததாய் கடந்துசெல்லப்படுபவர்.

(ஆஹா! இஃதெல்லாம் இலக்கியவுலகில் அதி சகஜமப்பா! )

என்றாலும்

அவர்க்கான புகழாஞ்சலிகள்

அனைவரிடமும் ஆயத்தமாக உள்ளன!

ஒருக்கால் அவருடைய படைப்புகள் நாட்டுடைமையாக்கப்பட்டால்

குறைந்தபட்சம் அவருடைய நான்கு நூல்களையாவது

அவசர அவசரமாக,

ஆயிரமில்லாவிட்டாலும் அறுநூறு அச்சுப்பிழைகளுடனாவது

வெளியிட்டுவிட _

அல்லது அன்னாரின் படைப்புகளைப் பற்றி

அரைகுறையாகவும் அறிந்திராத

அவருடைய குடும்பத்தாருக்கு

குத்துமதிப்பாக ஒரு சிறுதொகையைக் கொடுத்து

அவருடைய நூல்களில் பிரபலமானவற்றை

வன்பதிப்பு செய்ய _

சில வளர்ந்த பதிப்பகங்கள் என்றுமே

தயார்நிலையில்!