அன்பின் துன்பியல் - ’ரிஷி’ (லதா ராமகிருஷ்ணன்)

 2023, FEBRUARY 11 - மீள்பதிவு//

அன்பின் துன்பியல்

’ரிஷி’

(லதா ராமகிருஷ்ணன்)

எல்லோரிடமும் அன்பாக

எல்லோருடைய கருத்துகளையும் அங்கீகரிப்பதாக

எல்லோருடைய வலதுகரமாக

எல்லோருடைய வலியுணர்வாளராக

வீங்கிப்புடைத்திருக்கும் அன்பெனக் கருதும்

ஒன்றை

வர்ஜாவர்ஜமில்லாமல் வினியோகித்துத்

தன்னை வள்ளலாக்கிக் காட்டும் முனைப்பில்

தன் கையிலிருக்கும் அன்புப்பண்டத்தை

சின்னச்சின்னத்துண்டுகளாகக் கிள்ளியெடுத்து

அனைவருக்குமாய் ஆங்காங்கே வீசியெறிவதாய்

அணையாத விகசித்த புன்னகையோடு

விருப்பக்குறியிட்டவாறிருக்கும்

அன்பே யுருவானவராய்த்

தன்னைத்தான் கட்டங்கட்டிக் காட்டிக் கொண்டிருப்பவருக்கு

என்றேனுமொரு ’அன்புக்கடல்’ விருது

மட்டுமாவது

கிட்டாமலா போய்விடும்....?.