ஒருவர் - இன்னொருவர்
‘ரிஷி’
(லதா ராமகிருஷ்ணன்)
அவரைத் தூற்றிக்கொண்டேயிருந்தார் இவர்....
அவர் அல்ட்டாப்பு என்றார்;
அவர் அராஜகவாதி என்றார்;
அவரால்தான் பறவைகளால் பேசமுடியாமல் போனது என்றார்;
அவரால்தான் மீன்களால் தரையில் துள்ளிக்குதித்து விளையாட முடியவில்லை யென்றார்;
அவரால்தான் நட்சத்திரங்கள் பகலில் வெளிப்படுவ தில்லை யென்றார்;
அவரால்தான் முதுமையில் ஒருவருக்கு தோலில் சுருக்கங்களும் ஞாபகமறதியும் ஏற்படுகின்றன என்றார்.
அவர் அசிங்கம்பிடித்தவர் என்றார்;
அவர் ஆணவக்காரர் என்றார்;
அவர் நட்டு கழண்ட கேசு என்றார்;
அவர் நிராகரிக்கப்படவேண்டியவர் என்றார்;
'நன்றி நண்பரே – நாள்தோறும் என்னைப் பற்றியே எண்ணிக்கொண்டிருப்பதற்கும் பேசிக்கொண்டிருப்பதற்கும்' என்றபடி
தன்வழியே செல்லலானார்
அந்த இன்னொருவர்.
No comments:
Post a Comment