விட்டுவிடுதலையாகி….
‘ரிஷி
(லதா ராமகிருஷ்ணன்)
அருவப்பெருங்கனவுகளைப் பலவர்ணக் காற்றாடியாக்கிப் பறக்கவிட்டு
அதன் நூலிழையைப் பிடித்தேறி ஆகாயத்தைத்
தொட்டுக் களித்து
பிரபஞ்சகானத்தைப் படித்துக் கற்றுப் பாடிப் பரவி
ஆனந்தத்தில் வாலைக்குழைத்தொரு பப்பிநிலவாய்
அடிவானத்தில் பட்டொளிவீசி
குட்டிமூக்கால் எட்டுத்திக்கு வாசனைகளையும் முகர்ந்து
உள்வாங்கி கள்வெறி கொண்டுயிர்த்த
மனதின்
வனப்பையெல்லாம் வரிகளாக்கிச் சிறகடித்துப்பறந்துபோனதொரு
சிட்டுக்குருவி
விட்டுவிடுதலையாகி நிற்கும் வெளியெங்கும்
கொட்டிக்கிடக்கும் நட்சத்திரங்களின்
அட்சரலட்சங்களை
என்றென்றும் எண்ணியவாறிருக்க
என்ன தவம் செய்தனையோ என் நெஞ்சே
என் நெஞ்சே……
No comments:
Post a Comment