இயல் – இசை - நாடகம் - ரிஷி (லதா ராமகிருஷ்ணன்)

 இயல் – இசை - நாடகம்

ரிஷி

(லதா ராமகிருஷ்ணன்)

ஆளுக்கொரு ஆயத்தக் குழு வைத்திருக்கிறார்கள்

ஆட்களும் ஆட்களின் எண்ணிக்கையும் அடிக்கொருதரம்

மாறிக்கொண்டேயிருக்கும்.

எதிர்த்துத் தாக்கி வீசவேண்டிய எறிகணைகளுக்கேற்ப

முன்பின்னாகக் குழுவினர் இடம்மாற்றி நிற்பது இயல்பு

போலத் தெரிந்தாலும் அது தெளிவான திட்டமிடல்; ஆயத்தம்.

இயல்புபோல் இயல்பல்லாததைச் செய்வதே

இன்றைய இயல்பாகும் தகிடுதித்தம் கைவசப்படாதார்

கற்கால மனிதர்களுக்கும் முற்காலத்தவராக.

மாறி மாறித் தாக்கியும் தழுவிக்கொண்டும்

குழுக்கள் தனிநபராகி தனியொருவர்கள் குழுக்களாகி

பொழுதெல்லாம் அரத்தை சீவிக் கூர்தீட்டி

அறம் வளர்த்தபடி.....