அதோகதி - ரிஷி (லதா ராமகிருஷ்ணன்)

 அதோகதி

ரிஷி

(லதா ராமகிருஷ்ணன்)

கதியற்ற மக்களைக் கதைத்தேற்றுவதாய்

கதைத்துக் கதைத்துத்

தன் சக மனிதர்களின் தலைகளை கைகால்களை

மிதித்தபடி

தன்னையொரு உயரமான மேடையில் ஏற்றிக்கொண்டுவிட்டவர்

அங்கிருந்து யார்யார் மீதோ காறியுமிழ்ந்துகொண்டேயிருந்ததையும்

அவருடைய அருவருப்புப் பேச்சை

வாய்பிளந்து கேட்டபடியிருந்த

மனிதர்களையும்

கண்ட காகம் ஒன்று

விர்ரென்று பறந்துவந்து

அன்னாருடைய தலையில் எச்சமிட்டுப்

பறந்துசென்றது.