இருபத்தியேழாயிரத்து முக்காலே அரைக்கால் வார்த்தைகளில் எழுதப்படவேண்டிய குறுநாவல் ‘ரிஷி’ (லதா ராமகிருஷ்ணன்)

 இருபத்தியேழாயிரத்து முக்காலே அரைக்கால் வார்த்தைகளில் எழுதப்படவேண்டிய குறுநாவல்

‘ரிஷி’

(லதா ராமகிருஷ்ணன்)

குறுநாவல் போட்டியொன்று அறிவிக்கப்பட்டிருந்தது.

கலந்துகொள்வதற்கான நிபந்தனைகள் அழுத்தமான எழுத்துருவில் அடிக்கோடிடப்பட்டிருந்தன.

அவற்றிலொன்று குறுநாவல் மொத்தம் இருபத்தியேழாயிரத்து முக்காலே அரைக்கால் வார்த்தைகளுக்கு மேல் இருக்கக்கூடாது

என்று கறாராய் கூறியிருந்தது.

அதில் கலந்துகொள்ள ஆர்வமுற்றவன்

தனது கதையின் கதை, பாத்திரங்கள், நிகழ்வுகள்,

சந்தர்ப்பசூழல்கள், திடீர்த்திருப்பங்கள்

எல்லாவற்றையும் வார்த்தைகளின் எண்ணிக்கையாய் மட்டுமே

பார்த்தும் வார்த்தும் கோர்த்தும் போர்த்தும்

எழுதிமுடித்தான்.

பழுதடைந்திருந்தாலென்ன பரிசுவென்றால் போதும்

என்ற மனநிலை பக்குவமா பெருந்துக்கமா

என்ற வரிகளும் அவற்றின் வார்த்தைகளும்

போட்டிக்கான சட்டதிட்டங்களுக்கு அப்பால்

அந்தரத்தில் ஊசலாடியபடி…..