BADHAI HO - கண்ணியமான சித்தரிப்பு

 BADHAI HO 

 கண்ணியம் நுண்ணுணர்வு கலந்த சித்திரம்

லதா ராமகிருஷ்ணன்

எதைப் பற்றியும் கண்ணியமாகப் பேசமுடியும், கொச்சையாகவும் பேச முடியும்.

ஒரு விஷயத்தை எப்படிப் பேசுகிறோம் என்பது நம்மை அளக்குங் கருவி எனலாம்.

பல வருடங்களுக்கு முன்னால் தொலைக்காட்சி நிகழ்ச்சியொன்றில் ஒரு மூதாட்டியிடம் உங்களுக்கு எவ்வளவு குழந்தைகள் என்று கேட்ட நிகழ்ச்சித் தொகுப்பாளினி அந்த மூதாட்டி எட்டு என்பதுபோல் பதிலளித்ததும் இன்னும் நான்கு சேர்த்துப் பெற்றிருந்தால் கிரிக்கெட் டீம் கட்டிவிடலாமே என்று பேசி எல்லோரையும் சிரிக்கவைத்து தானும் குலுங்கிக்குலுங்கிச் சிரித்தார்.

ஏழெட்டு குழந்தைகள் பெற்றுக்கொள்வது இயல்பான நடைமுறையாக இருந்த காலகட்டத்தைச் சேர்ந்த ஒருவரை அப்படிப் பொதுவெளியில் நகைச்சுவைப் பொருளாக்கவேண்டுமா என்று வருத்தமாயிருந்தது.

இன்று ‘BADHAI HO’என்ற இந்திப் படத்தின் தமிழ்ப் பிரதியை தொலைக்காட்சி யில் பார்க்கக் கிடைத்தது. வளர்ந்த பிள்ளைகள் இருக்கும் நடுத்தர வயதைக் கடந்த பெண் கருத்தரித்துவிடுகிறார். ( அருமையான நடிகை நீனா குப்தா இந்தக் கதாபாத்திரத்தில்) கருக் கலைப்புக்கு ஒப்புக்கொள்வதில்லை. அதன் விளைவாய் ஆரம்பத்தில் அவருடைய மகன்கள் கொள்ளும் கோபம், வெளியாட்களின் பரிகாசத்துக்கு அவர்கள் ஆளாதல், பின் படிப்படியாய் தாய் – தந்தையை அவமானத்திற்காளாக்குவது தேவையில்லை என்று உணர்ந்துகொள்வது என இயல்பான முதிர்ச்சியோடும் empathyயோடும் கதைக்கருவை அணுகியிருந்த விதம் குறிப்பிடத்தக்கது.

பரிவும் புரிதலும் மனமுதிர்ச்சியும் இல்லாதவர் கள்தான் எல்லோரையும் எல்லாவற்றையும் மதிப்பழிப்பதையே தங்கள் முழுமுதற்கடனாகக் கொள்கிறார்கள் என்று தோன்றுகிறது.